SISA … Kalaallit Nunaata soraarnerussutisiaqalernissamut aningaasaateqarfia

SISA ilaasortanit pigineqarpoq taamaattumillu aktionærinut sinneqartoorutisitsisussaanani. Siunertaq tassaavoq soraarnerussutisiaqalernissamut aaqqissuussinermik pilerinartunik Nunatrsinni kattuffinnut aamma inuussutissarsiortunut neqorooruteqarnissaq, tamatumani pingaartinneqarluni katersat erniaannik qaffasinnerpaanik pissarsisitsinissaq aammalu aarlerinaatit minnerpaaffimmiinnissaat.

SISA pilersinneqarpoq 1999-imi sulinermik inuussutissarsiuteqartunut SIK-ip isumaqatigiissutai tunngavigalugit akissarsiaqartitaasunut soraarnerussutisiaqalernissamut aningaasaateqarfittut, ullumikkulli soraarnerussutisiassanik aaqqissuussinernik neqorooruteqarpoq sulianut assigiinngitsunut tamanut sulisunut aamma suliffeqarfinnut assigiinngitsunik suliaqarfiusunut tamanut.

Suliffeqarfiit Nunatsinniittut assigiinngitsut 200-it sinneqartut soraarnerussutisiassanut katersanik SISA-mut akiliutinik akilioraapput. Ukiumullu soraarnerussutisiassanut katersanut katillugit akiliutigineqartarput 200 millioner kruunit angullugit aammalu soraarnerussutisiassatut katersat tamakkiisut katillugit 3 milliard kruunit angullugit erniortitaralugit. Katersatut akilioraatit aamma katersat uninngasuutit annertuumik amerliartorput, taamatullu soraarnerussutisissanik aaqqissuussiffigineqartut amerliartupiloorlutik. SISA ullumikkut 35.000 –it missaaniittunik ilaasortaqarpoq, taakkunannga 16.000-it ingerlaavartumik akilioraasuullutik, 1.000-iat soraarnerussutisianik tigooqqaalereersuullutik sinnerilu uninngasutut taaneqarsinnaasutut akilioraanngikkallartutut ilaasortaallutik.

Misigisimavugut Kalaallit Nunatsinni inuiaqatigiinni peqataalluarluta aamma innuttaasut pissusissamisoorsoraat Nunatsinni soraarnerussutisiassanik katersivimmut katersaqarnissartik. SISA-p allattoqarfiata Nuummiittup ilaasortat kalaallisut qallunaatullu sullitaraat.

Tunngaviatigut soraarnerussutisiassatut aaqqissuussinerit sulisut ataasiakkaat atorfeqartitaalernermikkut pisussaaffigaat. Taamaattumillu aaqqissuussinerit ilusilersugaapput assigiimmik pisussaaffeqarnermik tunngavilimmik.

Paasissutissat pisariaqartitatit internetikkut quppersakkatsinni nassaarisinnaanngikkukkit attavigiinnassavatsigut.

SISA
Issortarfimmut 11/102
Postboks 9
3900 Nuuk
Telefon 32 40 22
Telefax 32 71 30
E-mail: sisa@sisa.gl