Ilisimasariaqakkat

Soraarnerussutisiassanik aaqqissuussineq.
Sulisartut, suliffeqarfinni SIK-p isumaqatigiissuteqarfigisimasaani suliffeqartut, isumaqatigiissutinilu pineqartuni soraarnerussutisiaqalernissamut toqqorterisussaanermik ilaqartunik atuisut, SISA-mut soraarnerussutisiassaminnik toqqorterisussaatitaapput.

Suliffeqarfimmi, pisortat ingerlataanni imaluunniit kattuffimmi atorfeqartitaaguit SIK-illu isumaqatigiissutai tunngavigalugit suliffeqarlutit taava SISA-imi soraarnerussutisiaqalernissamut aaqqissuussinermut ilaasussaatitaavutit.

Sulisitsisumit akilioraaneq unitsinneqarpoq – akilersuinngikkaluarluni ilaasortaaneq.
Soraarnerussutisiassannut akilioraaneq unitsinneqarpat, akilioraajunnaarluni ilaasortaasutut nalunaarsorneqalissaatit. Taamatut pisoqarsinnaavoq assersuutigalugu allamik suliffittaarsimaguit suliffittaannilu SISA-mi katersisussaatitaanermik pisussaatitaaffeqarnak.
Katersatit ingerlaavartumik ernialersorneqassapput SISA-p aningaasaliissuteqarnermini sinneqartoorutisiai / iluanaarutai tunngavigalugit, taamalu soraarninngoruit  tigusartagaqalissaatit Utoqqalinersiutisiaqarneq pillugu Inatsisartut inatsisaanni ukiorititaasoq tunngavigalugu (2017-imi ukioritinneqarput 66-it).

Katersat sillimmaserneri – depotsikring aamma ingerlaannassaaq, kisianni sulisinnaajunnaarnermi tigusartagaqarsinnaaneq akiliisarunnarnermiit ullut 60-it qaangiunneranni periarfissaajunnaassaaq.
Meerarisanut “utoqqalinersiuteqartitsineq” akiliisarnerup unitsinneqarneranniit qaammatit 12-it qaangiuppata aatsaat periarfissaajunnaassapput.

Sulisitsisumit akilioraaneq unitsinneqarpoq – nammineerluni akilioraaneq.
Akilioraangikkallarluni ilaasortaanerup kingunerisaanik
sulisinnaajunnaarnermi tigusartagaqarsinnaanerup aamma meerarisat “utoqqalinersiuteqartitaasinnaanerisa” peerneqarnissaat pinngitsoortinneqarsinnaavoq. Illit nammineq akilioraanikkut soraarnerussutisiassatut aaqqissuussinerit ingerlatiinnarsinnaavat qulaanilu taaneqartut atuutitiinnartillugit. Taamaaliornikkut aamma katersatit akilioraanikkut alliartortiinnarsinnaavatit. Tamanna pillugu paasisaqarnerorusukkuit attavigitigut. 

Soraarninngornermi tigusartagassat annertussusaat.
Ulloq taanna soraarninngoruit SISA-p naatsorsussavaa soraarninngorninni tigusartagassatit. Soraarninngorninni tigusartagassatit annertussusilerneqassapput qanoq annertutigisunik katersisimanerit tunngavigalugu.

Soraarnerussutisiassappit tigusartagarilernissaat kinguartissinnaavat inatsimmi periarfissiissutaasumit kingusinnerusumut. Taamaaliussaguit tamatumap kingunerissavaa tigusartagaleriumaagassappit annertunerulernerinik.

Soraarnerussutiassatut tigooraanerit inuunerit naallugu qaammatikkaartumik pisassaaq. Tigusartagassatilli ukiumut katinnerini 8.000 kr.-inik annikinnerussappata katersatit ataatsikkut tigusinnaassavatit akileraarut ilanngaatigalugu.

Soraarninngoreeruit tigusartakkatit ukiut tamaasa aaqqiivigineqartassapput. Aaqqiinerup taassuma tunngavigissavai SISA-p aningaasaliissuteqartarnermini pissarsiarisartagai aammalu Nunatsinni inuuneqqortussutsip nikissinnaanera.

Soraarninngunnginninni naatsorsussavarput tigusartagarilerumaakkappit annertussusissaat. Tamanna SISAnet-imi takusinnaassavat. Naatsorsuinermi aallaaviussapput qaammatini kingullerni 24-ini akiliutigisarsimasappit assigiimmik annertussuserisimasaat.

Katersappit alliartorsimanerat.
Soraarnerussutisiassatut katersappit annertussusaat taamalu soraarnerussutisiarisartagassatit qanoq annertutigissanersut arlalinnik tunngaveqarput:

Katersannut akiliutigisartakkatit.
Katersannut akiliutigisartakkatit nammineq akiliutinnit aamma suliffigisappit akiliutigisaannik tunngaveqarput. SISAnet-imi takusinnaavatit akiliutigineqartartut annertussusaat. Nalunaarsukkatta qanoq inneri illit akissarsiappit allagartaannit allaaneruppata SISA-mut attaveqassaatit. 

Aningaasaliissuteqartarnermi sinneqartoorutisiat / erniasiat.
SISA-p aningaasaliissuteqartarnermini  sinneqartoorutisiaanit / erniasiaanit katersatit ernialersorneqartarput. Tamanna pillugu Aningaasaliiffigisat takuuk.

Allaffissornermi aningaasartuutit (2018).
Allaffissornermi aningaasartuutit matussuserniarlugit akiliutaasunit SISA 5 %-imik akiliuteqartitsisarpoq, aammalu katersannut akilioraasoqartillugu 3,90 kr.-inik qaammammut akiliuteqartitsisarluni. 
Akilioraanngikkallartoqartillugu allaffissornermut qaammammut 9,60 kr.-inik akiliisitsisoqartarpoq aamma soraarninngoreersimaguit allaffissornermut aningaasartuutinut qaammammut 16,00 kr.-inik akiliisitsisoqartarpoq, taakkua katersanniit ilanngaatigineqartarput.

Sillimmasernermi akiliutit.
Sillimmasernermut akiliutit katersanit ilanngaatigineqartarput, taamaalillutit sulisinnaajunnaarnermi aamma meerarisanut toqukkut qimagunnermi “utoqqalinersiutit” sillimmaserneqartarput taamaalillunilu tigooqqaasinnaaneq qulakkeerneqartarluni. 

Apeqqutissaqaruit - SISA-mut attaveqarit.
Soraarnerussutisiassat pillugit apeqqutissaqaruit allaffigaluta imaluunniit sianerfigaluta attavigisinnaavatsigut.