FAQ

Qaaqugu soraarnerusussutisiassakka tigusinnaavakka?
Soraarninngornermi inatsit malinneqarpoq. (Utoqqalinersiuteqarneq pillugu Inatsisartut inatsisaat) Ullumikkut 66-inik ukioqalernermi utoqqalinersiuteqalertoqarsinnaavoq.

Siusinaartumik suliunnaarnersiuteqalernikuuvunga, soraarnerussutisiassakka tigusinnaavakka?
Siusinaartumik pisortaniit qaffasinnerpaamik soraarnerussutisiaqarnissannut akuerineqarsimaguit periarfissaqartitaavutit napparsimalernissat sioqqullugu qaammatini kingullerni 24-ini agguaqatigiisillugu akiliutigisarsimasappit annertoqqataanik qaammatikkaartumik tigooqqagaqartitaanissannut.

Katersakka qanoq amerlatigippat?
Apeqqutaavoq:

  • Qanga isumaqatigiissutit malillugit akissarsiaqalersimaneq.
  • Qanoq sivisutigisumik sulisimaneq.
  • Katersatit malinnaavigikkit uani www.sisanet.dk

Erniat qanoq annertutigippat?
Katersatit ataaavartumik ernialersorneqartarput SISA aningaasaliissuteqarnermini erniasianit. Tamanna takuuk Aningaasaliiffigisat –ni.

Katersakka qanoq sivisutigisumi SISA-mi uninngasinnaappat?
Katersannit tigooqqaalernissat qaqugumulluunniit kinguartissinnaavat.

Uanga nammineq ilaasortanngornianngilanga, kiap ilaasortanngortikkaminga?
Kinaluunniit isumaqatigiissutit malillugit akissarsiaqartoq sulisitsisup ilaasortanngortittarpaa.

SISA-mut ilaasortaajunnaarusuppunga, qanoq iliussaanga?
S.I.K.-p isumaqatigiissutai malillugit aningaasarsiaqartilluni ilaasortaajunnaartoqarsinnaanngilaq.

Napparsimavunga – soraarnerussutisiassakka tigusinnaavakka?
Napparsimaneq tunngavigalugu soraarnerussutisiassat tiguneqarsinnaanngillat.

Pisortanit annertunerpaamik sulisinnaajunnaarnersiuteqalernissamut akuerineqarsimaguit periarfissaqarputit SISA-miit tigooqqaalernissannut apeqqutaalluni napparsimalerlutit suliunnaannginninni akiliutigisarsimasatit qanoq annertutiginersut. Taanna taasarparput sulisinnaajunnaarnermi tunniussineq.

Toqukkut qimagukkuma kiap soraanerussutisiassatut katersakka kingornutissavai?
Soraarninngornissat sioqqullugu toqukkut qimagukkuit katersatit qimatannut qaninnerpaanut tunniunneqassaput, allamik aalajangiussisimanngikkuit. Tamanna pillugu annertunerusumik Immersugassat ataani “Soraarnerussutisiassat kimik kingornunneqassappat”-imi atuarsinnaavatit.

Soraarninngornissat sioqqullugu toqukkut qimagukkuit meeqqallu 24-it ataallugit ukioqarpat-a SISA meeqqannut ukiumoortumik “soraarnerussutisiaqartitsissaaq”, meqqaamut ataatsimut 5.000 kr. meeqqap 24-inik ukioqalernissaata tungaanut. Soraarnerussutisiassannut akilioraajunnaarsimaguit siusinaartumillu sulisinnaajunnaarnersiutinik tigooraanak meerarisat-it “soraarnerussutisiassaqartinneqanngillat”.

Soraarninngoreerlutit toqukkut qimagukkuit ukiullu qulit soraarninngorninniit qaangiussimanngippata qimatatit soraarnerussutisiassatut ukiut qulini sinneruttuni pissarsiassaraluatit kingornussitinneqassapput, taamaalillutit SISA-miit katillugit ukiuni qulini katersannit pissarsiassatit tunniunneqassallutik.

Soraarnerussutisiassatut katersakka katersivimmut allamut nuunneqarsinnaappat?
Soraarnerussuteqalernissamut toqqortikkat soraarnerussutisiaqalernissamut aningaasaateqarfimmut allamut nuunneqarsinnaapput. Allamik suliffittaarnermi pinngitsoorani soraarnerussutisiaqalernissamut aningaasaateqarfimmut allamut akilersuisussaatitaanermik piumasaqarfiusumut.

Atorfimmiit allamit nuunnermi soraarnerussutisiassatut katersat aamma SISA-mut nuunneqarsinnaapput, isumaqatigiissutit SISA-mut soraarnerussutisiassanik katersinissamik aalajangersagartaqartut tunngavigalugit.

Maluginiaqquneqarpoq soraarnerussutisiassatut katersat katersivimmut allamut nuunnerini aningaasartuuteqartoqarsinnaammat.

Katersakka nuukkusuppakka – piumasaqaatit suuppat?
Soraarnerussutisiassatut katersatit katersivimmut allamut nuunniarukkit aatsaat tamanna pisinnaavoq atorfininninnut atatillugu soraarnerussutisiassanut katersivimmut aalajangersimasumut katersiveqarnissannut atorfittaarninnut atatillugu piumasarineqarpat. Nammineerlutit  soraarnerussutisiassatut katersatit nuuginnarsinnaanngilatit.